Започнати активности за подготовка на новата Национална стратегија за спречување на корупцијата и судирот на интереси 2026-2030
Во периодот 6-8 мај 2025 година, во просториите на Државната комисија за спречување на корупцијата беа одржани првични состаноци со меѓународен експерт Константин Паликарски, како и двајца национални експерти, Александар Наумовски и Марина Серафимовска, ангажирани од страна на Канцеларијата на Обединетите нации за дрога и криминал (UNODC), а со цел разгледување на активностите за поддршка на Државната комисија во процесот на подготовка на новата петгодишна Национална стратегија за спречување на корупцијата и судирот на интереси 2026-2030 (НС2026-2030).
На состаноците, покрај претставници на Државната комисија и експертите, присуствуваа и Александар Ѓоргевиќ од UNODC, компонентниот лидер од проектот „Поддршка на ЕУ за владеење на правото“ Роман Прах, како и Александра Крстеска од канцеларијата на Националниот демократски институт (NDI)
Заменик претседателката на ДКСК, м-р Билјана Каракашова Шулев, најпрво изрази благодарност до UNODC и до останатите партнери, кои континуирано даваат поддршка на ДКСК во доследно и ефикасно спроведување на нејзините надлежности, а се осврна и на претстојните предизвици пред кои е исправена Државната комисија за спречување на корупцијата, во процесот на подготовка на НС2026-2030. Таа накратко им го презентираше донесениот план на активности за подготовка на НС2026-2030, како и законските обврски кои ДКСК треба да ги преземе во функција на подготовка на Националната стратегија.
Како први и појдовни активности од споменатиот план се: Развој на Методологија за проценка на ризиците од корупција, Изготвување на Проценка на ризиците од корупција, како и Подготовка на методологија за изготвување на Национална стратегија за спречување на корупцијата и судирот на интереси 2026-2030. Овие три активности ќе се реализирааат со експертска поддршка од UNODC и истите ќе го дадат правецот и формата на следната генерација на национална стратегија, а ќе бидат основа за следните активности за подготовка на овој стратешки документ.
Експертите ги претставија своите визии и размислувања за пристапот за изготвување новата стратегија, со посебен осврт на првите три активности од оперативниот план.
Сите присутни ја истакнаа својата заложба за изготвување на квалитетна и спроведлива Национална стратегија.
