Соработка во насока на унапредување на интегритетот во изборниот процес
На 14 јули 2025 година, во просториите на Државната комисија за спречување на корупцијата, се одржа работен состанок помеѓу Државната комисија за спречување на корупцијата и Државната изборна комисија, со присуство на претставници од Мисијата на ОБСЕ во Скопје.
Состанокот беше посветен на продлабочување на соработката меѓу двете институции, со особен фокус на прашањата поврзани со интегритетот во изборниот процес. Претставниците на ДИК изнесоа прашања и дилеми со кои се соочуваат поврзани со можен судир на интереси кај членови на изборните органи. Во таа насока, членовите на ДКСК ја потенцираа важноста изборните органи да бидат навремено информирани и постојано свесни за својата законска обврска да пријавуваат можен судир на интереси, особено во престојниот предизборен и изборен период.
Стана збор за потребата од формализирање на меѓусебната координација преку склучување на Меморандум за соработка со цел да се обезбеди брзо и усогласено постапување во случаи на потенцијален судир на интереси и други ситуации што бараат итна проценка и институционален одговор.
На состанокот активно учествуваа членови и претставници од обете институции, заедно со претставниците од Мисијата на ОБСЕ во Скопје, кои исто така изразија поддршка за иницијативите и понатамошното унапредување на изборниот интегритет во земјата.
