ДКСК започнa со активности за подготовка на Национална стратегија за спречување на корупцијата и судирот на интереси 2026–2030
Државната комисија за спречување на корупцијата (ДКСК), во согласност со својата законска надлежност утврдена во член 18 од Законот за спречување на корупцијата и судирот на интереси („Службен весник на РМ“ бр. 12/2019), отпочна со подготовка на нова петгодишна Национална стратегија за спречување на корупцијата и судирот на интереси за периодот 2026–2030 година, заедно со акционен план за нејзино спроведување.
Како дел од овој процес, ДКСК изготви План на активности, според кој ДКСК донесе Методологија за проценка на ризиците од корупција за потребите на изработката на национална стратегија за спречување на корупцијата и судирот на интереси, а потоа беа организирани четири фокус групи за Проценка на ризиците од корупција во Република Северна Македонија. Работилниците се одржаа на 04 и 05 јуни 2025 година, во просториите на ДКСК. Присутни беа претставници од институции од централната власт, независните тела, ЈП и АД, заедно со претставници од бизнис заедницата и граѓанскиот сектор.
Овие активности претставуваат прв чекор кон сеопфатна анализа на ризиците од корупција, врз основа на која ќе се темели идната национална стратегија. Преку вклучување на релевантни чинители и институции, ДКСК цели кон транспарентен и инклузивен процес на креирање политики за борба против корупцијата.
Во таа насока, на сите учесници во работилниците им беше достапен структуриран сет на прашања за фокус групи, кој послужи како алатка за претходна консултација и координација внатре во организациите, со цел активно и квалитетно учество.
ДКСК, продолжувајќи со забрзано темпо да ги исполнува сите активности поврзани со подготовката на новата Национална стратегија за спречување на корупцијата и судирот на интереси и воедно, охрабрува сите поканети претставници на институции, граѓански организации и експерти активно да се вклучат во процесот, со што заеднички ќе придонесеме кон создавање поефикасен систем за превенција на корупцијата и зајакнување на интегритетот во јавниот и приватниот сектор.
