Средба со Евроамбасадорот Н.Е. Михалис Рокас
Денес, на 02 февруари 2026 година, во просториите на Државната комисија за спречување на корупцијата (ДКСК), се одржа работен состанок со Н.Е. Михалис Рокас, Амбасадор на Европската унија во Република Северна Македонија. Амбасадорот се сретна со претседателот и членовите на Комисијата, при што беше изразено заедничко задоволство од континуираната и конструктивна соработка помеѓу ДКСК и Европската унија.
На состанокот беа презентирани и дискутирани клучните тековни и планирани активности на ДКСК, со посебен акцент на стратешките приоритети во областа на превенцијата од корупција, институционалниот интегритет и јакнењето на системската отпорност на јавните институции.
Амбасадорот беше сеопфатно и директно информиран за приоритетната агенда на ДКСК во делот на институционалниот интегритет, особено во единиците на локалната самоуправа и во правосудниот сектор, како области со зголемен ризик од корупција и суштинско значење за владеењето на правото. Во таа насока, беше нагласено дека надлежностите и експертизата на ДКСК во делот на унапредувањето на институционалниот интегритет претставуваат клучен инструмент за долгорочна и одржлива превенција, надополнувајќи ги репресивните механизми.
Посебно внимание беше посветено на завршувањето на следењето на Националната стратегија за спречување на корупцијата и судирот на интереси 2021–2025, како и на процесот на подготовка и донесување на новата Национална стратегија за периодот 2026–2030. Во овој контекст, беше истакнато дека новата Стратегија ќе претставува клучен стратешки документ за усогласување на националните политики со европските стандарди и препораки, со засилен фокус на превенција, мерливи резултати и институционална координација.
Во рамки на состанокот беа презентирани и активностите поврзани со унапредувањето на законската рамка за лобирање, како и претстојната јавна кампања за подигнување на свеста, која ќе се реализира со поддршка на ИПА проект. Дополнително, беше дискутирана и соработката со Бирото за јавни набавки во делот на следењето на јавните набавки, како значаен сегмент на антикорупциските политики, која ќе биде системски зајакната и интегрирана преку новата Национална стратегија 2026–2030.
На состанокот беше отворено и прашањето за унапредување на транспарентноста и отчетноста во работењето на ДКСК, вклучително и преку менување на функционалната анализа и систематизацијата, како и преку континуирана дигитализација на процесите. Притоа, беше нагласено дека дигиталната трансформација претставува стратешки приоритет на ДКСК, но и постојан предизвик, имајќи го предвид ограничениот буџетски капацитет.
На крајот од состанокот беше истакната клучната улога на Владата и Собранието во обезбедувањето институционална поддршка, соработка и политичка посветеност за ефективно, независно и одржливо функционирање на ДКСК, како централен столб на националниот антикорупциски систем.
