Учество на ДКСК на конститутивната седница на Меѓуресорското тело за координација на активностите против корупцијата
На 8 април 2025 година, во Свечената сала на Владата на Република Северна Македонија се одржа конститутивната седница на Меѓуресорското тело за координација на активностите против корупцијата. На седницата учествуваше и Државната комисија за спречување на корупцијата, претставувана од претседателката Татјана Димитровска и членовите Билјана Каракашова Шулев, Сервет Демири и Зоран Богоевски, како и советникот Сашко Колев.
Со седницата претседаваше Заменик-претседателот на Владата задолжен за политики за добро владеење, Арбен Фетаи. Во свечениот дел се обратија и Претседателот на Владата, Христијан Мицкоски, Амбасадорот на Европската Унија, Михаелис Рокас, заменик-шефицата на Мисијата на Амбасадата на САД, Никол Варнес, и Амбасадорот на ОБСЕ, Килиан Вал.
Покрај членовите на меѓуресорското тело, присуствуваа и претставници од други државни институции, меѓународни партнери и граѓанскиот сектор.
Во рамки на работниот дел, претседателката на ДКСК го презентираше Годишниот извештај за спроведувањето на Националната стратегија за спречување на корупцијата и судирот на интереси 2021–2025, за периодот јануари – декември 2024 година. Акцент беше ставен на степенот на реализација на активностите за 2024 година, вкупниот напредок од 2021 до 2024, како и подготовките за новата Национална стратегија 2026–2030.
Клучни наоди од извештајот:
- Од вкупно 154 активности предвидени за 2024 година, реализирани се само 28 (18%), 49 се во тек (32%), а 77 активности (50%) останале нереализирани.
- Во периодот 2021–2024, од евалуирани 284 активности, реализирани се само 89 (31%).
Дополнително, беше презентирана Анализата на факторите што влијаат врз степенот на спроведување на НС2021–2025, со идентификувани предизвици од структурна, организациска, регулаторна и процедурална природа. Меѓу најзначајните се:
- Недостиг на политичка волја,
- Недоволна примена на надзорната улога од страна на Собранието и Владата,
- Недостаток на соодветна организациска структура во ДКСК,
- Непостоење на буџетско планирање при креирањето на стратегијата.
Анализата содржи и конкретни насоки за унапредување на развојот и имплементацијата на новата стратегија 2026–2030.
Сите присутни ја истакнаа својата заложба за бескомпромисна и координирана борба против корупцијата, заснована на засилена меѓуинституционална соработка и партнерство со граѓанското општество и меѓународната заедница.
