Средба меѓу Државната комисија за спречување на корупцијата и Министерство за правда за унапредување на интегритетот и транспарентноста на изборниот процес
Претседателот на Државната комисија за спречување на корупцијата, Адем Чучуљ, оствари работна средба со министерот за правда, Игор Филков, на која се разговараше за реформите во изборното законодавство и за можностите за понатамошно унапредување на транспарентноста и интегритетот на изборниот процес.
На средбата беше нагласена улогата на Државната комисија за спречување на корупцијата во насока на јакнење на транспарентноста, отчетноста и интегритетот во изборниот процес, како и значењето на превентивното дејствување и меѓуинституционалната соработка во креирањето ефикасни и одржливи решенија.
Во таа насока, ДКСК своите забелешки, предлози и сугестии ќе ги достави до работната група задолжена за подготовка на реформите во изборното законодавство, со цел унапредување на законската рамка и натамошно зајакнување на механизмите за интегритет, отчетност и транспарентност.
Средбата е дел од поширокиот процес на консултации и соработка со релевантните институции и организации, меѓу кои Државната изборна комисија, Агенцијата за аудио и аудиовизуелни медиумски услуги, како и граѓанскиот сектор.
Државната комисија за спречување на корупцијата останува посветена на активен придонес во реформските процеси, преку инклузивен пристап и партнерство со сите релевантни чинители, со цел градење фер, транспарентен и демократски изборен систем.
