Учество на 19-ти состанок на Поткомитетот за правда, слобода и безбедност со Европската комисија во Брисел
Државната комисија за спречување на корупцијата на 13 и 14 март 2025 година учествуваше на 19-тиот состанок на Поткомитетот за правда, слобода и безбедност со Европската комисија во Брисел.
На состанокот, членовите на ДКСК, м-р Цвета Ристовска и Бесник Џемаиљи ги презентираа клучните постигнувања на институцијата на полето на спречување на корупцијата и судирот на интереси во 2024 година.
Во своето излагање, членот на ДКСК м-р Цвета Ристовска, се осврна на реализација на Националната стратегија за спречување на корупцијата и судирот на интереси 2021-2025 како и на активностите за подготовка на новата Национална стратегија 2026-2030 година. Таа, исто така, ги истакна напорите на ДКСК за градење на капацитетите, процесите на дигитализација, унапредување на соработката со надлежните институции особено со Јавното обвинителство и другите активности во насока на ефикасно исполнување на законските надлежности на ДКСК.
Во рамките на престојот во Брисел, членовите на ДКСК остварија средба со амбасадорот Зулфи Исмаили, Шеф на мисијата на Република Северна Македонија во Европската Унија, на која се разговараше за состојбите со борбата со корупцијата во Македонија, предизвиците со кои се соочува ДКСК во своето работење, како и за идните планови и програмата за работа на ДКСК.
