LIGJET VLEJNË PËR TË GJITHË NJËSOJ

KSHPK-ja ndjen për obligim ta informojë publikun për faktet e sakta dhe të mbrojë pozicionin e saj si një institucion i pavarur dhe transparent në luftën kundër korrupsionit.

Siç është e përcaktuar me ligj, KSHPK-ja ka detyrimin të zbatojë prevenimin dhe parandalimin e abuzimeve të mundshme të pozitës zyrtare, konfliktin e interesave dhe veprimet e paligjshme. Gjatë realizimit të kompetencave të saj, KSHPK-ja nuk vlerëson qëndrimet personale ose interesat politike të personave të përfshirë, por udhëhiqet vetëm nga faktet dhe detyrimet e përcaktuara me ligj.

Secili është i detyruar të respektojë Ligjin për parandalimin e korrupsionit dhe konfliktit të interesave, duke përfshirë edhe organet e drejtësisë. KSHPK-ja, si institucion i mëvetësishëm dhe i pavarur, ka kompetencë ligjore dhe obligimin të kujdeset për respektimin e plotë të dispozitave të Ligjit për parandalimin e korrupsionit dhe konfliktit të interesave dhe nuk do të heqë dorë nga misioni dhe qëllimi i saj. Konstatimi i shkeljes së ligjit me vendim nga KSHPK-ja, në asnjë rast nuk paraqet ndërhyrje në asnjë pushtet, pasi ligjet vlejnë njësoj për të gjithë. Veprimet dhe vendimet që janë në kundërshtim me Ligjin për parandalimin e korrupsionit dhe konfliktit të interesave krijojnë rreziqe për korrupsion dhe konflikt interesi dhe nuk duhet të qëndrojnë si të tilla në qarkullimin juridik.

Komisioni Shtetëror (nëpërmjet këtij komunikimi) riafirmon qëndrimin e tij të shprehur në Vendimin nr. 09-2838/12 të miratuar në seancën e mbajtur më 08.11.2024, se Vendimet e Këshillit Gjyqësor të RMV-së dhe Këshillit të Prokurorëve Publikë të RMV-së për emërimin e anëtarëve të Këshillit Drejtues të Akademisë për Gjyqtarë dhe Prokurorë Publikë nuk janë në përputhje me Ligjin për Parandalimin e Korrupsionit dhe Konfliktit të Interesave dhe me Ligjin për Akademinë për Gjyqtarë dhe Prokurorë Publikë. Pikërisht, ndalimi i paraparë për ushtrimin e aktiviteteve të tjera dhe anëtarësimin në borde drejtuese dhe mbikëqyrëse gjatë ushtrimit të funksionit vlen edhe në rastin konkret. Anëtarët e Këshillit Gjyqësor dhe Këshillit të Prokurorëve Publikë që janë nga radhët e prokurorëve dhe gjyqtarëve janë zgjedhur për ta ushtruar funksionin e anëtarit të këshillit në mënyrë profesionale dhe gjatë kohës së mandatit të tyre si anëtarë të këshillit nuk e ushtrojnë funksionin e gjyqtarit, gjegjësisht të prokurorit publik, por e njëjta pezullohet. Në të njëjtën kohë, me nenin 9 të Ligjit për Akademinë për Gjykatës dhe Prokurorë Publikë është qartë e paraparë që këshillat emërojnë nga dy anëtarë nga radhët e gjyqtarëve, respektivisht nga radhët e prokurorëve publikë, dhe jo nga radhët e tyre.

KSHPK shpreh mirënjohje për të gjitha institucionet që ndjekin punën e KSHPK-së dhe tregojnë gatishmëri për bashkëpunim dhe respektojnë vërejtjet dhe rekomandimet e KSHPK-së, duke dhënë kështu një kontribut për arritjen e qëllimit të përbashkët – parandalimin e korrupsionit në shoqëri.

KSHPK mbetet e përkushtuar në misionin e saj dhe siguron se çdo aktivitet i ndërmarrë është me përgjegjësi të plotë, transparencë dhe në interes të qytetarëve të Republikës së Maqedonisë së Veriut.

Me respekt,

KOMISIONI SHTETËROR PËR PARANDALIMIN E KORRUPSIONIT