Vizitë pune e Inspektoratit të Lartë të Drejtësisë së Republikës së Shqipërisë

Më 12 shkurt 2026, në ambientet e Komisionit Shtetëror për Parandalimin e Korrupsionit (KSHPK), u mbajt takim pune me delegacionin e Inspektoratit të Lartë të Drejtësisë së Republikës së Shqipërisë, të kryesuar nga z. Artur Metani, Inspektor i Lartë i Drejtësisë, me mbështetjen e Prezencës së OSBE-së në Shqipëri dhe Misionit të OSBE-së në Shkup. Delegacioni, në kuadër të vizitës së punës në Shkup, u takua me kryetarin dhe anëtarët e KSHPK-së, me ç’rast u shpreh kënaqësi e përbashkët për mundësinë e bashkëpunimit dhe shkëmbimit të përvojave.

Z. Artur Metani ndau vlerësimet dhe përvojat e tij në lidhje me organizimin institucional dhe kompetencat e KSHPK-së, të përfituara gjatë pjesëmarrjes në Konferencën Rajonale për integritetin në gjyqësor dhe prokurori, e cila u mbajt në Tiranë më 25–26 shtator 2025. Konferenca u organizua bashkërisht nga Inspektori i Lartë i Drejtësisë i Republikës së Shqipërisë dhe prezenca e OSBE-së në Shqipëri, në bashkëpunim me Misionet e OSBE-së në Beograd, Podgoricë, Prishtinë, Sarajevë dhe Shkup.

Në këtë kontekst, ai theksoi rëndësinë e organizimit të takimeve vjetore të rregullta në vendet e rajonit, me qëllim shkëmbimin e përvojave dhe praktikave për të siguruar respektimin e parimeve të pavarësisë, llogaridhënies dhe integritetit në sistemin e drejtësisë, si dhe ruajtjen e një ekuilibri mes tyre. Gjithashtu ai prezantoi edhe mekanizmat që përdor Inspektorati i Lartë i Drejtësisë i Republikës së Shqipërisë për të rritur vetëdijen publike mbi rëndësinë e parandalimit të korrupsionit në drejtësi.

Delegacioni u njoh në mënyrë të plotë dhe të drejtpërdrejtë me mekanizmat që përdor KSHPK-ja për të forcuar integritetin personal dhe institucional në sistemin e drejtësisë, duke përfshirë edhe mbështetjen e Misionit të OSBE-së në Shkup për përshtatjen e politikave të integritetit në gjyqësor dhe gatishmërinë e gjykatave në Republikën e Maqedonisë së Veriut për të vendosur sistemin e integritetit brenda funksionimit të tyre. Në këtë kontekst, u vlerësua roli i KSHPK-së në rritjen e besimit të publikut te institucionet e drejtësisë.

Vëmendje e veçantë iu kushtua bashkëpunimit të KSHPK-së me Këshillin Gjyqësor të Republikës së Maqedonisë së Veriut dhe ndarjes së ekspertizës së saj në përgatitjen e Programit të ri dhe Planit të Veprimit për parandalimin dhe monitorimin e korrupsionit në sistemin gjyqësor për periudhën 2026–2030.

Kryetari i KSHPK-së i njoftoi përfaqësuesit e delegacionit edhe me procesin e miratimit të Strategjisë Kombëtare për Parandalimin e Korrupsionit dhe Konfliktit të Interesit 2026–2030, në fokus të së cilës vazhdon të mbetet sektori i drejtësisë.

Në kuadër të takimit u prezantuan kompetencat dhe mënyra e veprimit të KSHPK-së lidhur me denoncimet për dyshime për korrupsion në fushën e drejtësisë, verifikimin e gjendjes së pasurisë dhe parandalimin e konfliktit të interesit të personave zyrtarë në sektorin e drejtësisë.

Gjatë takimit u diskutua edhe mundësia e bashkëpunimit të KSHPK-së me organin kundër korrupsionit në Republikën e Shqipërisë. Kryetari i KSHPK-së, z. Adem Çuçul, i informoi të pranishmit me bashkëpunimin ekzistues me Agjencinë për Parandalimin e Korrupsionit në Kosovë dhe theksoi gatishmërinë e institucionit për të nënshkruar një memorandum bashkëpunimi edhe me organin kundër korrupsionit në Republikën e Shqipërisë.

Në përfundim të takimit, të dyja palët konfirmuan rëndësinë e mbështetjes institucionale, bashkëpunimit dhe përkushtimit profesional për një luftë efektive, të pavarur dhe të qëndrueshme kundër korrupsionit dhe konfliktit të interesit. U theksua gjithashtu nevoja për thellimin e bashkëpunimit dhe shkëmbimin e përvojave dhe njohurive mes vendeve të rajonit,meqëllim përballimin e suksesshëm të korrupsionit.