Takim me përfaqësuesit e Zyrës për asistencë teknike të Ministrisë së Financave të SHBA-ve
Komisioni Shtetëror për Parandalimin e Korrupsionit mbajti takim me Thomas Matthews dhe Laura Costelli, nga Zyra për asistencë teknike e Ministrisë së Financave të SHBA-ve, të cilët po punojnë në një projekt në Republikën e Maqedonisë së Veriut me Drejtorinë e të Ardhurave Publike dhe Drejtorinë e Doganave. Në takim mori pjesë edhe Kristina Karanakova, analiste politike në Ambasadën e SHBA-ve.
Zyra për asistencë teknike e Ministrisë së Financave të SHBA-ve po zbaton një projekt dyvjeçar me Drejtorinë e të Ardhurave Publike dhe Drejtorinë e Doganave, i cili përfshin disa komponentë, ndër të cilët është edhe anti-korrupsioni. Për këtë arsye u iniciua takimi me Komisionin Shtetëror për Parandalimin e Korrupsionit, me qëllim të marrjes së qëndrimeve dhe informatave nga KSHPK-ja lidhur me aktivitetet aktuale që kanë të bëjnë me gjendjen e korrupsionit dhe luftën kundër tij, si dhe përcaktimin e aktiviteteve në kuadër të projektit që lidhen me kompetencat e Drejtorisë së të Ardhurave Publike dhe Drejtorisë së Doganave, të cilat do të përfshihen në Strategjinë e re Kombëtare për Parandalimin e Korrupsionit dhe Konfliktit të Interesave.
Anëtarët e Komisionit Shtetëror për Parandalimin e Korrupsionit i informuan mysafirët për statusin, kompetencat dhe aktivitetet aktuale të Komisionit, si dhe për sfidat me të cilat përballet në punën e tij. Veçanërisht u diskutua për përgatitjen dhe miratimin e Strategjisë së re Kombëtare, rëndësinë e zbatimit më efektiv të saj, evidentimin dhe ndjekjen e gjendjes pasurore, si dhe bashkëpunimin me organet tjera, para së gjithash me Prokurorinë Publike dhe Policinë Financiare.
Të dyja palët shprehën kënaqësinë për takimin dhe gatishmërinë për bashkëpunim të mëtejshëm në kuadër të projektit.
