KSHPK dhe DAP me aktivitet të përbashkët edukativ për forcimin e etikës dhe integritetit të nëpunësve tatimorë

Komisioni Shtetëror për Parandalimin e Korrupsionit, në bashkëpunim me Drejtorinë e të Ardhurave Publike, sot realizoi trajnim me temë “Etika dhe integriteti i të punësuarve në Drejtorinë e të Ardhurave Publike”, i orientuar drejt njohjes dhe parandalimit të sjelljes joprofesionale, joetike dhe korruptive.

Trajnimi është pjesë e bashkëpunimit të vazhdueshëm ndërmjet KSHPK-së dhe institucioneve të sektorit publik për forcimin e sistemit të integritetit, avancimin e standardeve profesionale dhe zhvillimin e kulturës së veprimit të përgjegjshëm, ligjor dhe të paanshëm.

Në kuadër të trajnimit u përfshinë disa tema me rëndësi për punën e përditshme të të punësuarve në DAP, si njohja me kornizën ligjore për parandalimin e korrupsionit dhe konfliktit të interesit, koncepti i integritetit, rreziqet nga korrupsioni në punën e DAP-it, veprimi etik, përdorimi i informacioneve zyrtare, menaxhimi i dhuratave dhe përfitimeve, konflikti i interesit, përjashtimi nga veprimi, si dhe roli i udhëheqësve, të punësuarve dhe personit për integritet në ndërtimin e një mjedisi pune me integritet.

Theks i veçantë iu kushtua faktit se integriteti paraqet vlerë personale, por edhe standard institucional që duhet të mbështetet me rregulla të qarta, procedura, kontrolle të brendshme, llogaridhënie dhe zbatim të qëndrueshëm të ligjeve. Në kontekst të punës së DAP-it, u theksua se institucioni vepron me të dhëna sensitive, merr vendime me ndikim të drejtpërdrejtë ndaj qytetarëve dhe sektorit afarist dhe punon në një mjedis ku është veçanërisht e rëndësishme të identifikohen dhe të menaxhohen me kohë rreziqet nga presionet, ndikimet joformale, konflikti i interesit dhe keqpërdorimi i informatave zyrtare.

Qëllimi i aktiviteteve të tilla edukative është që personat zyrtarë t’i njohin me kohë situatat e rrezikshme, të dinë si të veprojnë drejt, kur të kërkojnë këshillë, kur të paraqesin interes privat dhe kur të përjashtohen nga veprimi. Në këtë mënyrë mbrohen si institucioni ashtu edhe të punësuarit, ndërsa forcohet besimi i qytetarëve dhe personave juridikë ndaj sektorit publik.

KSHP-ja e përshëndet përkushtimin e Drejtorisë së të Ardhurave Publike për avancimin e integritetit institucional, veçanërisht në drejtim të zhvillimit të politikave të brendshme, standardeve etike dhe mekanizmave për parandalimin e korrupsionit. Kjo qasje paraqet një hap të rëndësishëm drejt krijimit të një sistemi në të cilin rregullat vlejnë njësoj për të gjithë, procedurat janë transparente dhe të verifikueshme, ndërsa interesi publik është parimi udhëheqës në punën e përditshme.