Pjesëmarrje në Forum Tematik për përdorimin e të dhënave për pronarët përfitues për reduktimin e korrupsionit

Më 28 janar 2026, kryetari i Komisionit Shtetëror për Parandalimin e Korrupsionit, Adem Çuçul dhe anëtarja e KSHKP-së, mr. Biljana Karakashova Shulev, morën pjesë në Forumin Tematik për përdorimin e të dhënave mbi pronarët përfitues në reduktimin e korrupsionit, të organizuar nga Qendra për Komunikime Qytetare.

Forumi u organizua në kuadër të projektit „Përdorimi i të dhënave për pronarët përfitues për reduktimin e korrupsionit“, i mbështetur nga Qeveria e Zvicrës përmes Civica Mobilitas. Në këtë ngjarje morën pjesë më shumë se 30 përfaqësues të institucioneve kyçe publike, organizatave të shoqërisë civile, mediave dhe organizatave ndërkombëtare, të cilët diskutuan mbi mundësitë dhe mënyrat e përdorimit të të dhënave nga Regjistri i pronarëve përfitues të subjekteve juridike, si një mjet i rëndësishëm në luftën kundër korrupsionit.

Kryetari i KSHKP-së, Adem Çuçul, theksoi se po punohet për lidhjen e drejtpërdrejtë të të dhënave nga disa institucione, ndër të cilat Regjistri Qendror, Agjencia e Kadastrës së Patundshmërive, Ministria e Punëve të Brendshme dhe Drejtoria e të Ardhurave Publike, me qëllim të mundësimit të verifikimit dhe përdorimit të drejtpërdrejtë të të dhënave, të cilat në të ardhmen do të jenë të qasshme edhe për publikun.

Ai theksoi se ndërthurja dhe interoperabiliteti i këtyre të dhënave janë kyçe për zbulimin e korrupsionit dhe konfliktit të interesit, si dhe për forcimin e transparencës.