Shkëmbim i përvojave dhe praktikave të mira ndërmjet institucioneve kundër korrupsionit të Maqedonisë së Veriut dhe Serbisë, me mbështetjen e ReSPA-së

Delegacioni i Komisionit Shtetëror për Parandalimin e Korrupsionit, i kryesuar nga kryetari Adem Çuçul, më 17 dhe 18 shtator 2026 qëndroi për vizitë studimore në Agjencinë për Parandalimin e Korrupsionit të Republikës së Serbisë në Beograd.

Vizita u realizua në kuadër të Programit të Mobilitetit të Shkollës Rajonale për Administratë Publike – ReSPA, me qëllim të shkëmbimit të njohurive, përvojave praktike dhe praktikave të mira në fushën e integritetit institucional, edukimit kundër korrupsionit, mësimit digjital, si dhe mbështetjes së institucioneve gjatë krijimit dhe zbatimit të sistemeve të integritetit.

Në delegacionin e KSHPK-së, përveç kryetarit të KSHPK-së, Adem Çuçul, morën pjesë edhe sekretarja e përgjithshme Maja Konevska, udhëheqësja e Njësisë për Planifikim Strategjik, Bashkëpunim, Projekte, Analizë dhe Edukim dhe personi për integritet, Aleksandra Çavdarevska, si dhe udhëheqësi i Njësisë për Parandalimin e Konfliktit të Interesit dhe Lobimit, Sashko Kolev.

Gjatë programit dyditor të punës, përfaqësuesit e të dyja institucioneve prezantuan kompetencat e tyre, proceset aktuale të reformave dhe përvojat praktike në zhvillimin dhe monitorimin e politikave për integritet. Vëmendje e veçantë iu kushtua kornizës ligjore dhe institucionale për integritetin në Serbi, programeve të trajnimit për grupe të ndryshme të synuara, zhvillimit të programeve mësimore dhe metodologjive, si dhe mekanizmave për monitorimin dhe vlerësimin e efekteve të aktiviteteve të zbatuara.

Një pjesë e rëndësishme e vizitës iu kushtua mësimit elektronik dhe përdorimit të mjeteve digjitale në edukimin kundër korrupsionit. U shqyrtuan struktura dhe përmbajtja e platformave për mësim elektronik, mënyrat për nxitjen e pjesëmarrjes së përdoruesve, qëndrueshmëria e zgjidhjeve digjitale dhe mundësitë për avancimin e tyre të mëtejshëm.

Përfaqësuesit e KSHPK-së prezantuan sistemin kombëtar të integritetit, përvojat nga zbatimi dhe monitorimi i tij, rolin e personave për integritet, realizimin e trajnimeve dhe zhvillimin e mjeteve elektronike.

Seancat e punës mundësuan një diskutim të hapur për sfidat në praktikë, ndër të cilat pronësia institucionale mbi proceset, mbështetja nga drejtuesit, rezistenca ndaj ndryshimeve, qëndrueshmëria e mekanizmave të vendosur dhe nevoja për koordinim efikas ndërinstitucional. U shqyrtuan gjithashtu mundësitë për përmirësimin e platformës për mësim elektronik dhe programeve të trajnimit të KSHPK-së, bazuar në përvojat e Agjencisë së Serbisë.

Të dyja institucionet konfirmuan rëndësinë e shkëmbimit të vazhdueshëm të njohurive dhe zgjidhjeve praktike, si dhe gatishmërinë për bashkëpunim të mëtejshëm në zhvillimin e trajnimeve, mjeteve digjitale, metodologjive për monitorim dhe mekanizmave për mbështetjen e institucioneve të sektorit publik.