Takim me Misionin për Vlerësimin e Nevojave (NAM) të ODIHR-it pranë OSBE-së

Anëtarët e Komisionit Shtetëror për Parandalimin e Korrupsionit, znj. Cveta Ristovska dhe z. Zoran Bogoevski, si dhe Sekretari i Përgjithshëm, z. Adem Çuçul, më 27.06.2025 realizuan takim me znj. Kseniya Dashucina, këshilltare e lartë për zgjedhje nga Zyra për Institucione Demokratike dhe të Drejtat e Njeriut – ODIHR pranë OSBE-së, dhe z. Ranko Vukçeviq, këshilltar për zgjedhje i ODIHR-it, si pjesë e misionit për vlerësimin e nevojave.

Misioni i ODIHR-it është për vizitë në Republikën e Maqedonisë së Veriut nga 24 deri më 27 qershor 2025, gjatë së cilës janë realizuar takime me disa institucione shtetërore, parti politike, organizata joqeveritare dhe media të përfshira në procesin e monitorimit të zgjedhjeve. Sipas metodologjisë standarde të ODIHR-it, qëllimi i Misionit është të vlerësojë ambientin parazgjedhor dhe përgatitjet e nevojshme për zgjedhjet e ardhshme, mbi bazën e të cilave NAM do të rekomandojë llojin e vëzhgimit që ODIHR do të zbatojë për zgjedhjet e ardhshme.

Anëtarët znj. Cveta Ristovska dhe z. Zoran Bogoevski i informuan përfaqësuesit e ODIHR-it mbi kompetencat e Komisionit Shtetëror për Parandalimin e Korrupsionit (KSHPK) në drejtim të monitorimit të financimit të fushatës zgjedhore, ndjekjes së shpenzimeve të mjeteve buxhetore dhe aktiviteteve të tjera të lidhura me procesin zgjedhor. Me këtë rast, ata informuan edhe për aktivitetet e realizuara në lidhje me ciklet e mëparshme zgjedhore, duke theksuar sfidat me të cilat është përballur KSHPK-ja për shkak të kapaciteteve të kufizuara.

Gjatë takimit, përfaqësuesit e KSHPK-së u ndalën te dobësitë sistemore dhe pasaktësitë ligjore që lidhen me monitorimin e procesit zgjedhor, duke theksuar se zbatimi i kompetencave të KSHPK-së gjatë zgjedhjeve të ardhshme lokale do të paraqesë një sfidë serioze, për shkak të përmasës së madhe të këtyre zgjedhjeve. Për këtë arsye, ata theksuan nevojën për mbështetje nga partnerët ndërkombëtarë.