Takim pune me Zëvendëskryeministrin e Qeverisë përgjegjës për qeverisje të mirë, z. Arben Fetai

Komisioni Shtetëror për Parandalimin e Korrupsionit, sot, në ambientet e Qeverisë së Republikës së Maqedonisë së Veriut, realizoi takim pune me Zëvendëskryeministrin e Qeverisë përgjegjës për qeverisje të mirë, z. Arben Fetai.

Takimi u mbajt me iniciativë të zëvendëskryeministrit Fetai, në drejtim të shkëmbimit të ideve për ndërmarrjen e aktiviteteve koordinuese për një përballje më efektive me sfidat në luftën kundër korrupsionit.

Zëvendëskryeministri Fetai theksoi se një nga prioritetet kryesore strategjike të Qeverisë është lufta kundër korrupsionit dhe vendosja e politikave sistemore për promovimin e transparencës, ndershmërisë dhe integritetit. Në këtë drejtim, ai theksoi angazhimin për forcimin e kornizës ligjore dhe institucionale për luftën kundër korrupsionit, mbështetjen për forcimin dhe avancimin e koordinimit ndërinstitucional të aktiviteteve për parandalimin dhe luftën kundër korrupsionit, me një theks të veçantë në përpilimin e Strategjisë Kombëtare për Luftën Kundër Korrupsionit dhe Konfliktit të Interesave 2026-2030.

Nënkryetarja e Komisionit Shtetëror për Parandalimin e Korrupsionit, Biljana Karakashova Shulev, dhe anëtarët e Komisionit informuan për aktivitetet aktuale dhe të planifikuara të komisionit, si dhe për sfidat me të cilat përballen në punën e tyre.

Në takim u diskutua për zbatimin e Strategjisë Kombëtare 2021-2025, arsyet e realizimit të saj të dobët, si dhe planet për përpilimin e Strategjisë së re Kombëtare 2026-2030. U konstatua bashkërisht se është i nevojshëm një qasje proaktive nga të gjitha palët e përfshira, me qëllim përpilimin e një Strategjie të re Kombëtare të qartë dhe të zbatueshme.

U diskutua edhe për aktivitetet e planifikuara të përbërjes së re të Trupit Ndërsektorial për Koordinimin e Aktiviteve në Luftën Kundër Korrupsionit, si dhe për procesin e përgatitjes së Propozim-ndryshimeve dhe plotësimeve të Ligjit për Parandalimin e Korrupsionit dhe Konfliktit të Interesave, i cili është në zhvillim e sipër.

Nga të dyja palët u shpreh gatishmëria për të avancuar bashkëpunimin dhe koordinimin e aktiviteteve, në drejtim të një parandalimi dhe luftimi më efikas të korrupsionit.