Shënimi i Ditës Ndërkombëtare të Luftës Кundër Korrupsionit
Komisioni Shtetëror për Parandalimin e Korrupsionit, sot, me rastin e shënimit të Ditës Ndërkombëtare të Luftës Kundër Korrupsionit, së bashku me partnerët nga Projekti i USAID-it për Partneritet Kundër Korrupsionit dhe Projektit “Komunitete me Integritet”, financuar nga Qeveria e Zvicrës dhe i implementuar nga Instituti Demokratik Kombëtar, organizoi një ngjarje solemne në Kuvendin e Republikës së Maqedonisë së Veriut. Gjatë ngjarjes, përveç fjalimit të kryetares së KSHPK-së, znj. Tatjana Dimitrovska, fjalime mbajtën edhe z. Afrim Gashi, kryetar i Kuvendit të Republikës së Maqedonisë së Veriut, Sh.S. Veronika Ullman, ambasadore e Zvicrës, z. Ben Nupnau, zëvendës shef i Delegacionit të Bashkimit Evropian dhe znj. Gerry Daibl, drejtoreshë e USAID-it.
Kryetarja e KSHPK-së, Tatjana Dimitrovska, në fjalimin e saj theksoi se Dita Ndërkombëtare e Luftës Kundër Korrupsionit është një kujtesë për pasojat serioze që korrupsioni i sjell shoqërive në mbarë botën. Njëkohësisht, ajo është një thirrje për forcimin e përpjekjeve dhe angazhimit të përbashkët për parandalimin e ndikimit shkatërrues të tij.
Dita Ndërkombëtare e Luftës kundër Korrupsionit nuk është vetëm një ditë për ngritjen e vetëdijes, por edhe një thirrje për veprime konkrete. Ajo na kujton se së bashku kemi fuqinë të ndërtojmë një shoqëri ku korrupsioni nuk ka vend, ku burimet janë të orientuara për mirëqenien e të gjithë qytetarëve dhe ku secili ka mundësi të barabarta për zhvillim, shtoi kryetarja Dimitrovska.
Duke theksuar bashkëpunimin e shkëlqyer me Entin Shtetëror të Revizionit, Prokurorinë Publike, Policinë Financiare dhe të gjitha institucionet e tjera kyçe që kanë një rol të rëndësishëm në luftën kundër korrupsionit, ajo theksoi se ky partneritet është baza për një veprim efektiv dhe të koordinuar.
Kryetarja Dimitrovska shprehu mirënjohje ndaj përfaqësuesve të komunitetit ndërkombëtar, të cilët njohin përpjekjet e KSHPK-së për forcimin e integritetit në institucionet në nivel kombëtar, lokal dhe gjyqësor. “Komuniteti ndërkombëtar përbën një partner të rëndësishëm në përpjekjet tona për të arritur një nivel të lartë të pavarësisë, profesionalizmit dhe dixhitalizimit, që do të shërbejë si bazë për suksesin, për të cilin të gjithë do të jemi krenarë,” theksoi kryetarja e KSHPK-së.
Kryetari i kuvendit Z. Afrim Gashi, theksoi se ky është momenti për të reflektuar mbi përpjekjet tona për ndërtimin e një shoqërie më të përgjegjshme. Ai gjithashtu foli për avancimin e punës në fushën e dixhitalizimit: “Në këtë drejtim, së bashku me organizatat joqeveritare, identifikuam pengesat kryesore në procesin e dixhitalizimit, për krijimin e sistemeve të reja dixhitale që do të përmirësojnë llogaridhënien dhe qasjen në informacione.”
Ambasadorja e Zvicrës Sh.S. Veronika Ullman, theksoi se për më shumë se dy dekada Zvicra i mbështet përpjekjet e Maqedonisë së Veriut për forcimin e demokracisë dhe qeverisjes së mirë, përmes bashkëpunimit me institucionet shtetërore, sektorin joqeveritar, partitë politike, mediat dhe angazhimin e qytetarëve. “Gjatë viteve, është arritur një përparim, por ende kemi sfida dhe ndryshime të rëndësishme përpara nesh,” tha Sh.S. Veronika Ullman. Ajo theksoi se Zvicra po i forcon përpjekjet e saj për të mbështetur luftën kundër korrupsionit, përmes projektit të ri në nivel lokal për komunitete me integritet, të zbatuar nga NDI.
Zëvendës shef i Delegacionit të Bashkimit Evropian Z. Ben Nupnau, theksoi se lufta kundër korrupsionit është një proces i vazhdueshëm, i mbështetur nga të gjithë dhe në çdo moment. “Tani është përgjegjësi e Qeverisë, Kuvendit, komunave dhe institucioneve të veprojnë sipas reformave,” tha ai.
Znj. Gerry Daibl, drejtoreshë e USAID-it, theksoi se për më shumë se 30 vjet, Qeveria e Shteteve të Bashkuara ka qenë partnere e Republikës së Maqedonisë së Veriut në luftën kundër efekteve të dëmshme të korrupsionit, dhe shtoi se transparenca dhe llogaridhënia mbeten në krye të prioriteteve të tyre. “Megjithatë, duhet të pranojmë se sistemet dhe strategjitë në vetvete nuk janë të mjaftueshme; duhet të vazhdojmë, pasi dëgjojmë shqetësime nga qytetarët se praktikat korruptive vazhdojnë sepse gjithmonë kanë qenë të pranishme. Qytetarët kërkojnë llogaridhënie dhe reforma, dhe për t’i zbatuar ato, duhet të kultivojmë një sjellje me zero korrupsion,” tha ajo.
Në kuadër të panel diskutimit, i cili ishte pjesë e ngjarjes, pikëpamjet për aktivitetet kyçe dhe sfidat në ndërtimin e një sistemi të qëndrueshëm kundër korrupsionit u shprehën nga kryetarja e KSHPK-së, Tatjana Dimitrovska, z. Lupço Prenxhov, bashkëkryetar i Grupit Parlamentar Ndërpartiak për Luftën Kundër Korrupsionit, z. Maksim Acevski, Revizor Kryesor Shtetëror i Revizionit, z. Elvin Veli, prokuror publik në Prokurorinë Publike të Republikës së Maqedonisë së Veriut, z. Zlatko Perinski, ministër i Vetëqeverisjes Lokale, znj. Daniela Rendevska, kryetare e Këshillit të Inspektoratit, znj. Mare Bogeva-Micovska, drejtoreshë e Byrosë për Furnizime Publike dhe znj. Snezhana Kamilovska-Trpkovska nga Platforma e Organizatave të Shoqërisë Civile për Luftën Kundër Korrupsionit.
Në fund të ngjarjes, kryetarja Tatjana Dimitrovska, në emër të KSHPK-së, shprehu mirënjohje të sinqertë për të gjitha institucionet e pranishme, si dhe për të gjithë partnerët që marrin pjesë në mënyrë aktive në përpjekjet për parandalimin e korrupsionit, duke theksuar se Komisioni Shtetëror për Parandalimin e Korrupsionit mbetet i përkushtuar në misionin e tij për të siguruar transparencë, llogaridhënie dhe integritet në institucionet publike.
