Komisioni Shtetëror për Parandalimin e Korrupsionit dhe Ministria e Administratës Publike nënshkruan Memorandum për bashkëpunim

Kryetari I Komisionit Shtetëror për Parandalimin e Korrupsionit, Adem Çuçul dhe Ministri i Administratës Publike, Goran Minçev, nënshkruan Memorandum për bashkëpunim, me të cilin vendosen themelet për një veprim të forcuar dhe të koordinuar në drejtim të rritjes së integritetit në sektorin publik. Me këtë, konfirmohet zotimi i përbashkët për përmirësimin sistemik të kapaciteteve të administratës dhe ndërtimin e një kulture të llogaridhënies, transparencës dhe profesionalizmit.

Bashkëpunimi është i orientuar drejt avancimit, promovimit dhe nxitjes së procesit të edukimit të nëpunësve administrativë, me qëllim ngritjen e vetëdijes dhe thellimin e njohurive në fushën e parandalimit të korrupsionit, konfliktit të interesit, mbrojtjes së sinjalizuesve, si dhe etikës dhe integritetit. Përmes një qasjeje të tillë pritet forcim i ndjeshëm si i integritetit personal ashtu edhe atij institucional, si dhe identifikim dhe adresim më i qartë i rreziqeve të korrupsionit në sektorin publik.

Në kuadër të bashkëpunimit të dakorduar, do të punohet në zhvillimin, avancimin dhe promovimin e përbashkët të programeve dhe aktiviteteve edukative, si dhe në krijimin e iniciativave me interes të përbashkët në përputhje me kompetencat e tyre ligjore.

Memorandumi parasheh edhe realizimin e hulumtimeve, shkëmbimin e të dhënave relevante dhe koordinim të vazhdueshëm për përcaktimin e udhëzimeve dhe rekomandimeve për përmirësimin e edukimit të administratës.

Me këtë partneritet dërgohet një mesazh i qartë se lufta kundër korrupsionit mbetet prioritet kryesor, i cili kërkon bashkëpunim të vazhdueshëm, njohuri dhe përkushtim institucional.