Vizitë studimore e delegacionit të Kuvendit të Malit të Zi në Komisionin Shtetëror për Parandalimin e Korrupsionit

Komisioni Shtetëror për Parandalimin e Korrupsionit sot mbajti takim pune me delegacionin e Kuvendit të Malit të Zi, i cili po qëndron për vizitë studimore në Republikën e Maqedonisë së Veriut, i shoqëruar nga përfaqësues të Institutit Demokratik Kombëtar (NDI) në Mal të Zi dhe në Maqedoninë e Veriut.

Delegacioni u informua në mënyrë të plotë për organizimin institucional të Komisionit Shtetëror, kompetencat e përcaktuara me Ligjin për Parandalimin e Korrupsionit dhe Konfliktit të Interesit, mbikëqyrjen parlamentare mbi punën e Komisionit Shtetëror, si dhe për mekanizmat parandalues me të cilët disponon institucioni në luftën kundër korrupsionit dhe konfliktit të interesit.

Në fokus të diskutimit ishte shkëmbimi i përvojave, praktikave dhe sfidave të të dy vendeve në lidhje me regjistrin e personave të zgjedhur dhe të emëruar, deklaratat për gjendjen pasurore dhe interesat, shqiptimin e sanksioneve për kundërvajtje, strategjinë kombëtare pesëvjeçare për parandalimin e korrupsionit dhe konfliktit të interesit, kontrollin kundërkorrupsion të legjislacionit dhe procedurën për zgjedhjen e kryetarit dhe anëtarëve të Komisionit Shtetëror. Me këtë rast, Komisioni Shtetëror theksoi edhe rëndësinë e mbështetjes nga NDI në Republikën e Maqedonisë së Veriut, si partner në zbatimin e mekanizmave kryesorë parandalues në luftën kundër korrupsionit.

Përfaqësuesit e delegacionit të Kuvendit të Malit të Zi me interes të veçantë u ndalën te mënyra e përdorimit të raporteve të Komisionit Shtetëror nga Kuvendi i Republikës së Maqedonisë së Veriut në luftën kundër korrupsionit, me ç ‘rast pas një diskutimi të ndërsjellë të dyja palët u pajtuan se është e nevojshme forcimi i vetëdijes në drejtim të përdorimit të rekomandimeve nga raportet e Komisionit Shtetëror si udhërrëfyes për tejkalimin e dobësive sistemore dhe rreziqeve nga korrupsioni në shtet, si dhe forcimi i mbikëqyrjes parlamentare, veçanërisht mbi zbatimin e Strategjisë Kombëtare Pesëvjeçare për Parandalimin e Korrupsionit dhe Konfliktit të Interesit.

Sa i përket bashkëpunimit me sektorin civil, u theksua edhe bashkëpunimi i vendosur i Komisionit Shtetëror me Platformën e Organizatave Civile për Luftën kundër Korrupsionit, si partnerë, por njëkohësisht edhe kritikë të rëndësishëm të punës së institucionit, me qëllim forcimin e luftës efektive kundër korrupsionit.

Si pjesë e kornizës strategjike për luftën kundër korrupsionit, u theksua edhe bashkëpunimi i Komisionit Shtetëror me Agjencinë për Parandalimin e Korrupsionit të Malit të Zi, si dhe shkëmbimi i deritanishëm i përvojave dhe praktikave të mira në fushëveprimin e kompetencave të të dy institucioneve.

Në fund të takimit, në mënyrë të ndërsjellë u konfirmua rëndësia e sigurimit të mbështetjes institucionale, bashkëpunimit dhe përkushtimit profesional për një luftë efektive, të pavarur dhe të qëndrueshme kundër korrupsionit dhe konfliktit të interesit, si dhe nevoja për thellimin e bashkëpunimit ndërmjet Maqedonisë së Veriut dhe Malit të Zi dhe shkëmbimin e njohurive dhe përvojave me qëllim përballimin me sukses të korrupsionit.